Ólympíuleikar eru stærsta og mesta íþróttahátíð
heimsbyggðarinnar. Hver íþróttamaður á sér draum um að keppa fyrir
þjóð sína á Ólympíuleikum. Íslendingar hafa tekið þátt í leikunum
síðan í London árið 1908 er leikarnir fóru fram í London.
Hvað varðar vetrarleika tóku Íslendingar fyrst þátt árið 1948 er
leikarnir fóru fram í St. Moritz.
Árið 1956 fóru sumarleikarnir fram í Melbourne í Ástralíu. Á
leikunum vann Vilhjálmur Einarsson mesta íþróttaafrek Íslendings
til þess tíma. Í annarri umferð stökk hann 16,25 m. (seinna breytt
í 16,26 m.) og setti Ólympíumet í þrístökki. Ólympíumet Vilhjálms
stóð ekki lengi því Brasilíumaðurinn Da Silva sló það seinna í
keppninni en árangur Vilhjálms tryggði honum silfurverðlaun.
Aðrir verðlaunahafar Íslendinga á Ólympíleikum hafa verið Bjarni
Friðriksson júdókappi sem hlaut bronsverðlaun í Los Angeles árið
1984, Vala Flosadóttir stangarstökkvari sem fékk einnig
bronsverðlaun þegar hún varð fyrst íslenskra kvenna til að vinna
til verðlauna á Ólympíuleikum í Sydney árið 2000 og
karlalandsliðið í handknattleik sem hlaut silfurverðlaun á leikunum
í Peking árið 2008.