|
Hvernig
líkamsþjálfun hentar eldra fólki?
Mikilvægt er að finna þá hreyfingu sem hentar hverjum og einum.
Líkamlegt ástand fólks getur verið mjög mismunandi, sumir eru í
mjög góðu líkamlegu formi og geta gert nánast hvað sem er á meðan
öðrum dugar að ganga um íbúðina sína eða fara nokkrar ferðir upp og
niður stiga. Öll erum við sammála um að hreyfing er
nauðsynleg.
Mikilvægt er að hafa í huga að fara rólega af stað og smá bæta við
álagið. Ráðfæra sig við lækni ef viðkomandi hefur ekki hreyft sig í
lengri tíma. Nauðsynlegt er að hlusta á eigin líkama og læra að
þekkja viðbrögð hans við þjálfun. Eðlileg viðbrögð við þjálfun er
þegar áreynsla er við hæfi þ.e. hæfileg þreyta, örari hjartsláttur,
létt mæði og það er í lagi að svitna. Ef viðkomandi finnur fyrir
svima, ógleði, mikilli mæði eða verk í brjóstinu er álagið of mikið
og ráðlagt að stöðva þjálfun.
Gott er að gera léttar líkamsæfingar heima og er
morgunleikfimin í Ríkisútvarpinu, sem er alla virka morgna
klukkan 9:50, tilvalin til þess.
Gott er að blanda saman þolþjálfun t.d. með göngu og
sundi og styrktarþjálfun t.d. leikfimisæfingum. Æskilegt er að
þjálfa 2-4 sinnum í viku, allt eftir getu hvers og eins.
Hvað er næg hreyfing??
Lýðheilsustöð hefur gefið út almennar hreyfiráðleggingar. Þar segir:
• Fullorðnir hreyfi sig með miðlungsákefð eða mikilli
ákefð í minnst 30 mínútur daglega.
• Börn og unglingar hreyfi sig með miðlungsákefð eða mikilli
ákefð í minnst 60 mínútur daglega.
Miðlungsákefð er t.d. rösk ganga, garðvinna,
heimilisþrif, sund, hjólreiðar og leikfimi.
Mikil ákefð er t.d. fjallganga, skokk, hlaup og flestar íþróttir
stundaðar með árangur í huga.
|
