Afrekskvennasjóður Íslandsbanka og ÍSÍ

Til Afrekskvennasjóðs Íslandsbanka var stofnað með framlagi bankans árið 2007. Tilgangur sjóðsins er að styðja við bakið á afrekskonum í íþróttum og gera þeim betur kleift að stunda sína íþrótt og ná árangri.

Sjóðsstjórn skipa Svafa Grönfeldt, Vanda Sigurgeirsdóttir og Þórdís Gísladóttir.

Endurskoðun fer nú fram á reglugerð um sjóðinn. Að lokinni þeirri endurskoðun verða styrkir úr sjóðnum auglýstir að nýju til umsóknar.



Afrekskvennasjóður Íslandsbanka og ÍSÍ

 Reglugerð


1. grein

Sjóðurinn heitir Afrekskvennasjóður Íslandsbanka og ÍSÍ. Sjóðurinn var stofnaður í janúar 2007 með 20 milljón króna framlagi bankans. Sjóðurinn er undir stjórn Íþrótta- og Ólympíusambands Íslands, kt. 670169-0499, og er til heimilis í höfuðstöðvum íþróttahreyfingarinnar í Íþróttamiðstöðinni í Laugardal, 104 Reykjavík.

2. grein – Markmið og hlutverk

Markmiðið með stofnun sjóðsins er að efla afreksstarf kvennaíþrótta í sinni víðustu mynd. Sjóðurinn mun þannig virka sem hvatning og stuðningur við afreksíþróttakonur úr einstaklings- og hópíþróttum, sem stefna að frekari framförum og árangri í íþrótt sinni.

3. grein  – Stjórn

Stjórn sjóðsins skal skipuð þremur konum sem tilnefndar eru af Íslandsbanka og ÍSÍ. Sjóðsstjórnin er skipuð árlega, formaður sérstaklega. Sjóðsstjórnin heyrir undir framkvæmdastjórn ÍSÍ og skal gera tillögur sínar um úthlutanir til hennar.

4. grein – Grundvöllur styrkveitinga

Við mat á umsóknum, mun sjóðsstjórn leggja til grundvallar almennt viðmið íþróttahreyfingarinnar um stöðu íþróttamanna og flokka í afreksstarfi. Einnig verða möguleikar einstaklinga og flokka á að ná framförum í íþrótt sinni metið. Afreksíþróttakonur og flokkar allra íþróttagreina sem viðurkenndar eru af ÍSÍ teljast styrkhæfar.
Sjóðsstjórn áskilur sér rétt til að meta afrek og verkefni í samræmi við 2. grein reglugerðar þessarar.
 

5. grein – Tilhögun styrkveitinga og umsóknir

Stefnt skal að því að veita styrki úr sjóðnum tvisvar sinnum á ári, í febrúar og september ár hvert. Umsóknir skulu berast sjóðsstjórn á þar til gerðum eyðublöðum, sem sjóðsstjórn lætur útbúa og eru aðgengileg á heimasíðu Íslandsbanka og ÍSÍ. Einstaklingar, íþróttafélög, héraðssambönd, íþróttabandalög og sérsambönd geta sótt um styrki úr sjóðnum. Sjóðsstjórn er þó heimilt að hafa frumkvæði að einstaka styrkveitingum. Umsóknir og önnur gögn skulu geymd í skjalasafni Afrekssjóðs ÍSÍ, í vörslu Íþrótta- og Ólympíusambands Íslands. Sjóðsstjórn ber að svara skriflega öllum umsóknum sem berast sjóðsstjórninni.

6. grein – Styrkir

Styrkir til einstaklinga og flokka eru fyrst og fremst til að standa undir kostnaði við æfingar og keppni, samkvæmt framlagðri áætlun.
Skilgreindur kostnaður í umsóknum verður að tengjast viðkomandi verkefni, t.d. ferðakostnaður, þátttaka í mótum, búningakostnaður, æfingagjöld og annar kostnaður tengdur uppbyggingastarfi íþróttakvenna. Greiðslufyrirkomulag styrkja verður þannig að helmingur styrkupphæðar greiðist við styrkúthlutun og helmingur við uppgjör til sjóðsstjórnar.

7. grein – Skyldur styrkþega

Í samræmi við gildandi reglur skulu allar íþróttakonur eða flokkar, sem þiggja styrk úr Afrekskvennasjóði Íslandsbanka og ÍSÍ, hlíta þeim siða- og agareglum sem Íþrótta- og Ólympíusamband Íslands setur auk reglna um lyfjanotkun og lyfjaeftirlit. Styrkhafar úr sjóðnum skulu gæta velsæmis í hvívetna enda miklar fyrirmyndir fyrir ungar verðandi afrekskonur. Styrkþegi úr sjóðnum samþykkir að koma fram í verkefnum á vegum Íslandsbanka og ÍSÍ er lúta að uppbyggilegu hvatningar- og ímyndarstarfi aðila.

8. grein – Endurskoðun reglugerðar

Reglugerð þessi skal endurskoðuð árlega og samþykkt af Íslandsbanka og ÍSÍ.

Samþykkt á fundi framkvæmdastjórnar ÍSÍ 19. desember 2009.