Ólympíuleikar

Ólympíuleikarnir

Ólympíuleikar eru stærsta og mesta íþróttahátíð heimsbyggðarinnar.

Um keppnina

Ísland tók fyrst þátt á Sumarólympíuleikunum í London árið 1908 og Vetrarólympíuleikunum í St. Moritz árið 1948. Ísland tók ekki þátt í Ólympíuleikunum 1924, 1928 og 1932 vegna slæms efnahagsástands. Síðan 1936 hefur Ísland tekið þátt í öllum leikum nema Vetrarólympíuleikunum í Sapparo í Japan 1972.

Skoða vef Alþjóðaólympíunefndarinnar um Ólympíuleika

Vetrarólympíuleikar

Á Vetrarólympíuleikum er keppt í greinum sem flokkast undir vetraríþróttir og fer keppni fram á snjó eða ís.

Fyrstu vetrarleikarnir voru haldnir í Chamonix í Frakklandi árið 1924. Leikarnir voru haldnir á fjögurra ára fresti fram til 1940 þegar þeir voru stöðvaðir vegna seinni heimsstyrjaldarinnar. Vetrarleikarnir voru næst haldnir 1948 og héldust með óbreyttu sniði (fjögur ár á milli) til 1992. Þá ákvað Alþjóðaólympíunefndin að láta vetrar- og sumarleika hlaupa á tveimur árum. Næstu vetrarleikar urðu því árið 1994 í Lillehammer, Noregi og hafa síðan verið á fjögurra ára fresti.

Margar þjóðir hafa haldið Vetrarólympíuleikana og sumar þeirra oftar en einu sinni. Bandaríkin hafa fjórum sinnum verið gestgjafar, oftar en nokkur önnur þjóð. Leikarnir hafa þrisvar sinnum verið haldnir í Frakklandi, tvisvar í Austurríki, Kanada, Ítalíu, Japan, Noregi og Sviss.

Íþróttagreinar sem keppt er í á leikunum eru: alpagreinar, skíðaskotfimi, sleðagreinar (bobsleigh, luge, skeleton), skíðaganga, krulla, listskautar, skautar - frjáls aðferð, íshokkí, spretthlaup á skautum, skíðastökk, snjóbretti og skautahlaup.

Sumarólympíuleikar

Sumarólympíuleikarnir eru einn stærsti einstaki alþjóðlegi íþróttaviðburðurinn sem haldinn er á fjögurra ára fresti, öðru nafni nefndir Leikar Ólympíuöðunnar. Leikarnir færast á milli heimsálfa og borga í hvert sinn sem þeir eru haldnir. Það að borg er kosin (borgir þurfa að sækja um að halda leikana) er jafnan talin mikill heiður og yfirleitt litið á það sem mikla lyftistöng fyrir borgina, samfélagið og þjóðina að hafa verið valin til að halda leikana.

Fyrstu Ólympíuleikarnir fóru fram fyrir meira en 2000 árum síðan í Grikklandi til forna. Fyrstu nútíma Sumarólympíuleikarnir voru haldnir í Aþenu árið 1896 að frumkvæði Pierre de Coubertin. Tveimur árum áður hafði honum tekist að koma saman 79 fulltrúum frá 12 þjóðum til að ræða enduvakningu Ólympíuleika Forn-Grikkja. Í kjölfarið var Alþjóðaólympíunefndin (International Olympic Committee, IOC) stofnuð þann 23. júní 1894 og var grískur viðskiptamaður að nafni Demetrios Vikelas valinn sem fyrsti forseti Alþjóðaólympíunefndarinnar. Á þessum fyrsta stofnfundi var ákveðið að halda leikana á fjögurra ára fresti og að fyrstu leikarnir yrðu í Aþenu 1896.

Leikarnir í Aþenu voru því Leikar I Ólympíuöðunnar. Á þessum fyrstu Ólympíuleikum tóku 200 íþróttamenn þátt og komu þeir frá 13 þjóðum. Verðlaunaafhending fyrir fyrsta, annað og þriðja sæti var ekki tekin upp fyrr en árið 1904 í St. Louis, Missouri í Bandaríkjunum.

Keppnisgreinar á fyrstu leikunum í Aþenu voru einungis 42. Til samanburðar þá voru þær 302 í Peking árið 2008.

Ólympíuleikar