Ferðasjóður íþróttafélaga

Ferðasjóður íþróttafélaga veitir styrki til íþrótta- og ungmennafélaga vegna keppnisferða innanlands. Sjóðurinn hefur fengið árlegt framlag á fjárlögum Alþingis frá árinu 2007.
Íþrótta- og Ólympíusamband Íslands (ÍSÍ) sér um umsýslu, útreikninga og úthlutun styrkja.

Sækja um í ferðasjóð íþróttafélaga

Umsóknarfrestur

Sótt er um í sjóðinn eftir á, þ.e. eftir að ferð hefur verið farin. Umsóknarsvæðið opnar venjulega á miðju ári og er þá hægt að stofna umsókn og skrá þær ferðir sem þegar hafa verið farnar. Þegar ljóst er að ekki verði fleiri ferðir farnar á árinu þá er hægt að senda umsóknina inn. Endanlegur skilafrestur umsókna rennur út snemma í janúar ár hvert og er umsóknarfresturinn auglýstur vel á miðlum ÍSÍ í aðdraganda frá opnun umsóknarsvæðið ár hvert.

Skilafrestur fyrir umsóknir ársins 2026 rennur út mánudaginn 11. janúar 2027.

Til athugunar:

Listi yfir styrkhæf mót birtist inni í umsóknarkerfinu eftir að umsókn hefur verið stofnuð.
Í hópíþróttum eru einungis Íslandsmót styrkhæf
(allir aldurshópar nema öldungaflokkar).
Í einstaklingsíþróttum eru fleiri mót styrkhæf, til dæmis:
- Íslandsmót
- Bikarmót
- Meistaramót
- Mótaraðir sem gefa stig til Íslandsmeistaratitils

Vinnureglur við úthlutun

Réttur félaga til að sækja um

Öll íþrótta- og ungmennafélög innan ÍSÍ geta sótt um styrk vegna keppnisferða innanlands, fyrir alla aldurshópa í viðurkenndum íþróttagreinum, á skilgreind styrkhæf mót.

Skilyrði fyrir styrkhæfri ferð

Til að teljast styrkhæf þarf ferð að vera að minnsta kosti 150 km aðra leið.
Fjarlægð er reiknuð frá aðsetri félags að keppnisstað.

Útreikningur ferðakostnaðar

ÍSÍ notar fast viðmið á hvern kílómetra til að tryggja sambærilegan útreikning á ferðakostnaði milli félaga.
Styrkur miðast ekki við raunverulegan kostnað sem félög skila inn, heldur við kostnað sem reiknaður er út samkvæmt reglum sjóðsins.

Við útreikning er meðal annars tekið mið af:

fjarlægð ferða
fjölda þátttakenda
fjölda ferða

Jöfnun ferðakostnaðar milli félaga

Til að jafna stöðu félaga sem þurfa að ferðast oft, langt og með marga iðkendur er notaður upphæðarstuðull, sem hækkar styrk í þrepum eftir heildarútreiknuðum ferðakostnaði.

Íþróttahéruðum er skipt í flokka og hvert hérað fær landsbyggðarstuðul, sem byggist á fjarlægð helstu byggðarkjarna frá höfuðborgarsvæðinu.
Landsbyggðarstuðull margfaldast við upphæðarstuðul. Hámark margföldunar er 3.

Kostnaður sem telst ekki styrkhæfur

Einungis beinn ferðakostnaður er styrkhæfur.
Gistikostnaður og annar tengdur kostnaður fellur ekki undir styrkveitingar.

Greiðsla styrkja

Styrkir eru greiddir út í febrúar eða mars vegna keppnisferða ársins á undan.
Framkvæmdastjórn ÍSÍ staðfestir úthlutun sjóðsins áður en greiðsla fer fram.

Staðfesting og endurskoðun vinnureglna

Vinnureglur sjóðsins eru staðfestar af mennta- og menningarmálaráðuneytinu.
Breytingar á reglum eru gerðar í samráði við ráðuneytið.