Ari Vilberg keppir í skylmingum í Dakar á morgun, 13. nóvember

Skylmingamaðurinn Ari Vilberg Jónasson keppir í höggsverði karla á Ólympíuleikum ungmenna í Dakar á morgun, föstudaginn 13. nóvember. Ari kom til Senegal fyrir nokkrum dögum með Gunnari Agli Ágústssyni þjálfara sínum. Brynja Guðjónsdóttir aðalfararstjóri tók á móti þeim en hún hefur verið í Dakar frá upphafi leikanna.

Ferðin hefur ekki gengið alveg snurðulaust fyrir sig. Farangur Ara, þar á meðal hluti af skylmingabúnaðinum, skilaði sér ekki í Ólympíuþorpið fyrr en í morgun og það riðlaði æfingunum töluvert. Það var því mikill léttir þegar hann kom loksins. Í dag tekur Ari fyrstu æfinguna í keppnismannvirkinu.

Þegar þeir komu gekk hitabylgja yfir Dakar með 35–37 stiga hita en vindurinn hefur bjargað miklu. Þeir eru að venjast hitanum og eru ánægðir með aðstöðuna og matinn í þorpinu.

Keppnin á morgun
Keppni í höggsverði karla hefst kl. 9 en nákvæmari tímasetningar liggja ekki fyrir. Senegal er á sama tímabelti og Ísland svo tímarnir eru þeir sömu hér heima.

• Mótherjar og úrslit: í fellilista má sjá hverjum Ari mætir
• Bein útsending

Skylmingarnar eru síðasta keppnisgrein leikanna og annað kvöld tekur Ari svo þátt í lokahátíðinni sem fulltrúi Íslands.

Við óskum Ara góðs gengis.