Íslenski hópurinn á Ólympíuleikum ungmenna í Dakar 2026 valinn
Framkvæmdastjórn Íþrótta- og Ólympíusambands Íslands (ÍSÍ) hefur staðfest tilnefningar Sundsambands Íslands (SSÍ) og Skylmingasambands Íslands (SKY) á þeim keppendum og fylgdarliði sem fara munu fyrir hönd Íslands á Ólympíuleika ungmenna í Dakar 2026.
Íslandi var úthlutað tveimur keppnissætum í sundi og einu keppnissæti í skylmingum. Þrír ungir íslenskir íþróttamenn munu því keppa fyrir Íslands hönd á leikunum.
Keppendurnir þrír, ásamt fylgdarliði, eru:
Sund
- Alexander Ari Andrason, keppandi í 50m flugsund, 100m flugsund, og 200m flugsund
- Sólveig Freyja Hákonardóttir, keppandi í 200m skriðsund, 400m skriðsund, og 50m baksund
- Hrafnhildur Lúthersdóttir, þjálfari
Skylmingar
- Ari Vilberg Jónasson, keppandi – Höggsverð/Sabre
- Gunnar Egill Ágústsson, þjálfari
Aðrir þátttakendur
- Brynja Guðjónsdóttir, aðalfararstjóri
- Ólafur Engilbert Árnason, sjúkraþjálfari
Um leikana
Ólympíuleikar ungmenna (Youth Olympic Games, YOG) fara fram í Dakar í Senegal dagana 30. október til 13. nóvember 2026. Þetta er í fyrsta sinn sem íþróttaviðburður á vegum Alþjóða-ólympíunefndarinnar er haldinn í Afríku.
Leikarnir eru haldnir á fjögurra ára fresti, bæði að sumri og vetri, og eru ætlaðir efnilegasta unga íþróttafólki heims. Þeir fóru fyrst fram í Singapore árið 2010 og hefur Ísland unnið til gullverðlauna í 200 m hlaupi stúlkna árið 2018 og silfurverðlauna í knattspyrnu drengja árið 2014. Til stóð að halda leikana árið 2022 en þeim var frestað um fjögur ár vegna COVID-19 heimsfaraldursins.
Keppt verður nú í 25 íþróttagreinum og er gert ráð fyrir þátttöku um 2.700 íþróttamanna.
ÍSÍ óskar keppendum og fylgdarliði góðs gengis og farsældar á Ólympíuleikum ungmenna í Dakar.
Nánari upplýsingar um leikana má finna hér: https://www.olympics.com/en/dakar-2026
