Fara í efni

Patrekur Jóhannesson hefur verið ráðinn til starfa sem sérfræðingur hjá Afreksmiðstöð Íslands.

Áður hafði verið greint frá því að Patrekur kæmi til starfa sem svæðisfulltrúi á höfuðborgarsvæðinu en reynsla og þekking Patreks úr afreksíþróttaheiminum hér heima sem og erlendis mun nýtast enn betur innan Afreksmiðstöðvarinnar. Patrekur er öllum hnútum kunnugur innan íþróttahreyfingarinnar en hann á að baki 243 landsleiki í handknattleik ásamt því að hafa þjálfað landslið og félagslið, bæði hérlendis og erlendis. Patrekur er menntaður íþróttafræðingur frá Háskólanum í Reykjavík og var síðast íþrótta- og rekstrarstjóri Stjörnunnar í Garðabæ.

„Patrekur er með yfirgripsmikla reynslu og þekkingu úr heimi afreksíþrótta sem mun nýtast vel í Afreksmiðstöðinni. Ég er mjög ánægð með það að fá hann til liðs við okkur og hlakka til þess að vinna með honum að því að bæta umgjörð afreksíþrótta á Íslandi,” segir Kristín Birna Ólafsdóttir, afreksstjóri ÍSÍ, en áherslusvið Patreks verður meðal annars í tengslum við faglega umgjörð hópíþrótta. Patrekur kemur inn í öflugan hóp Afreksmiðstöðvarinnar en þar starfa einnig, auk Kristínar Birnu, þau Brynja Guðjónsdóttir, sérfræðingur, og Vésteinn Hafsteinsson, sem nú er búsettur í Svíþjóð en verður áfram ráðgjafi hjá Afreksmiðstöðinni.

Afreksmiðstöð Íslands er stjórnstöð afreksíþróttastarfs á Íslandi og faglegur vettvangur fyrir afreksfólk ólíkra íþrótta. Afreksmiðstöðin var formlega stofnuð í maí og vinnur hún náið með sérsamböndum ÍSÍ. Markmiðið er fyrst og fremst að byggja upp og styðja við íslenskt afreksíþróttafólk og gera þeim kleift að komast í hóp þeirra bestu á alþjóðlegum vettvangi. Á meðal næstu verkefna á vettvangi Afreksmiðstöðvarinnar er koma á fót launasjóði afreksíþróttafólks og þjálfara og undirbúningur fyrir Vetrarólympíuleikana í Milano Cortina 2026.

„Mér líst rosalega vel á þetta, fyrirkomulagið er gott og Kristín Birna er frábær fyrirliði. Vésteinn kom inn með krafti og nú þarf að fylgja þessu vel eftir og móta áfram,” segir Patrekur.