Beint á efnisyfirlit síðunnar

Á döfinni

21

Ólympíuhátíð Evrópuæskunnar 25 ára

27.10.2016

Ólympíuhátíð Evrópuæskunnar á 25 ára afmæli í ár, en fyrsta hátíðin var haldin í Brussel 1991 og hét þá Ólympíudagar æskunnar. Á 45. ársþingi Evrópusambands Ólympíunefnda (EOC) nú í október var þessum áfanga fagnað með yfirlitssýningu í höfuðstöðvum Íþrótta- og Ólympíusambandsins í Brussel ásamt því að íþróttafólkið Elena M. Zamolodchikova fimleikakona frá Rússlandi og Ilias Iliadis júdómaður frá Grikklandi voru heiðruð, en þau unnu bæði til gullverðlauna á Ólympíuhátíð Evrópuæskunnar og á Ólympíuleikum. Um tuttugu íþróttamenn sem hafa unnið gullverðlaun á Ólympíuleikum kepptu í byrjun afreksíþróttaferils síns á Ólympíuhátíð Evrópuæskunnar.

Á Ólympíuhátíð Evrópuæskunnar keppa 14-18 ára íþróttamenn sín á milli, en „Fair Play eða háttvísi er eitt af megin einkunnarorðunum. Mikið er lagt upp úr því að þetta sé skemmtun og að þátttakendur kynnist ungu fólki frá öðrum löndum Evrópu. Ekki er lagt upp með að áherslan sé sú sama og á Ólympíuleikum þeirra fullorðnu eða á heimsmeistarakeppnum.

ÍSÍ hefur jafnan reynt að senda fríðan hóp ungs fólks á Ólympíuhátíð æskunnar. Á fyrstu hátíðinni, í Brussel, voru íslenskir þátttakendur 27 úr fjórum íþróttagreinum. Fyrsta Vetrarólympíuhátíð æskunnar var haldin árið 1993. Hér á vefsíðu ÍSÍ má lesa meira um Ólympíuhátíð Evrópuæskunnar.

Myndir með frétt