Beint á efnisyfirlit síðunnar

Á döfinni

18

Heidursholl_Vilhjalmur.jpg (202699 bytes)

Vilhjálmur Einarsson - Frjálsíþróttir, þrístökk



Þegar kom að því að útnefna í fyrsta skipti afreksíþróttamann í Heiðurshöll ÍSÍ á afmælishátíð ÍSÍ þann 28. janúar 2012 kom berlega í ljós hver á helst hug okkar og hjarta í þeim efnum. Það er Heiðursfélagi ÍSÍ, Vilhjálmur Einarsson, okkar fyrsti verðlaunahafi á Ólympíuleikum og mikill afreksíþróttamaður.

Vilhjálmur Einarsson fæddist 5. júní árið 1934. Vilhjálmur byrjaði ungur að stunda íþróttir og fór snemma að einbeita sér að þrístökki. Hann hóf sinn keppnisferil á skólamótum á Eiðum um 1950. Vilhjálmur keppti fyrir Íslands hönd í þrístökki á Ólympíuleikunum í Melbourne í Ástralíu þann 27. nóvember árið 1956. Vilhjálmur stökk 16.26 metra og setti þar með glæsilegt Ólympíumet. Það met bætti heimsmethafinn Da Silva frá Brasilíu með sigurstökki sínu á sömu leikum tveimur klukkustundum eftir að Vilhjálmur hafði sett metið. Vilhjálmur vann til silfurverðlauna á Ólympíuleikunum í Melbourne og var þar með fyrsti Íslendingurinn til þess að vinna til verðlauna á Ólympíuleikum. Hann er enn eini Íslendingurinn sem hefur sett Ólympíumet.

Vilhjálmur var sigursæll íþróttamaður allan sinn keppnisferil. Hann var einn af fremstu þrístökkvurum heims árin 1956-1962 og einnig á Evrópumælikvarða í langstökki sömu ár. Meðal afreka Vilhjálms voru þriðja sætið á Evrópumeistaramóti í Stokkhólmi árið 1958, fimmta sæti á Ólympíuleikunum í Róm á Ítalíu árið 1960, með glæsilegu stökki upp á 16.37 metra og sjötta sæti á Evrópumeistarmóti í Belgrad árið 1962, þar sem hann lauk ferli sínum með glæsibrag.

Vilhjálmur var valinn fyrsti íþróttamaður ársins á Íslandi þann 20. janúar árið 1956. Hann var valinn íþróttamaður ársins fjórum sinnum í viðbót, árin 1957, 1958, 1960 og 1961.

Vilhjálmur hefur ætíð sýnt íþróttum og íþróttahreyfingunni á Íslandi mikinn áhuga og velvilja. Hann hefur verið mörgum íþróttamanninum fyrirmynd og blásið okkur þjóðinni bjartsýni í brjóst með því að sýna og sanna að við getum vel unnið til verðlauna á alþjóðlegum stórmótum.

Það er ÍSÍ mikill heiður að útnefna Vilhjálm Einarsson fyrstan í Heiðurshöll ÍSÍ.

Myndasíða ÍSÍ - Vilhjálmur Einarsson.