Ólafía Þórunn Kristinsdóttir kylfingur var útnefnd Íþróttamaður ársins 2017 af Samtökum íþróttafréttamanna. Aron Einar Gunnarsson knattspyrnumaður var í öðru sæti og Gylfi Sigurðsson knattspyrnumaður var í þriðja sæti.  Nánari upplýsingar um kjör íþróttamanns ársins eru aðgengilegar á heimasíðu Samtaka íþróttafréttamanna.

Ólafía var hógværðin uppmáluð í viðtali eftir að kjör um Íþróttamann ársins 2017 var orðið kunnugt. Hún segist stefna á sigur á þeim mótum sem hún tekur þátt í á Evrópumótaröðinni og LPGA mótaröðinni á næsta ári og stefnir hátt í golfheiminum. Ólafía er glæsileg fyrirmynd fyrir íþróttafólk og óskar ÍSÍ Ólafíu til hamingju með viðurkenninguna og góðs gengis í framtíðinni.

Samtök íþróttafréttamanna veittu nú í sjötta sinn viðurkenningu til þjálfara ársins og var það Heimir Hallgrímsson sem hlaut þann heiður. Viðurkenning til liðs ársins fór til íslenska karlalandsliðsins í knattspyrnu.

ÍSÍ óskar verðlaunahöfum kvöldsins til hamingju með viðurkenningar sínar.